على حيط ف بيتنا...............(15)
....................
على حيط ف بيتنا
بطوبة خضرة من زمان
ذكرى مكان
كان ديك بيدن ف العصارى
ضحك و صل ع النبي
و حكالنا ف أبو زيد الهلالي
و تحت نخلة
جريدها بيدحرج غناوى
جدة حكيمة ف الكلام
كانت ملامح الوش فيها كيف دروب
أو قول هروب من الزمان
حوليها صحبه من الحريم الشقينين
بيفضفضوا هم الزمان
فى حجرها و شالها الحرير
و شاب شاور بالسلام رغم التعب
على لقمة العيش الحلال
تجرى عيا لوا تستخبى
و سط رجلين متعصين غلب الزمان
ساعتها يجنى راحة اغلى من الدهب
يمشى التعب ؟ يمشى التعب
كانت ف بيتنا أم طيبة
عاجنة عيشها خميرة بايتة
دقيق ف ميه مسكرة
نجرى و نخطف من مجورها
عجينه نونو
نلت فيها بغندرة
نعمل عروسة أو حصان
و اللعب بيها ع الحيطان
و تحت العتاب متبعترة
كان حوش ف بيتنا و دكتين
مفروشين بكليم رصاصى ف مندرة
ف العشا ع الطبالى فتت فطير
و زير بيروى م العطش
مركون ورا الباب الكبير
ساعة المسا
الجد بيحل المشاكل للجيران
يجمع سماح يطرح سلام
و الحكمة كانت ف المحن
و طبله بتلف البلد
بكرة الخميس دخلة و لد
على بت سمرة عيونها سود
كيف الغزال و اهو قلبه مال
قدم وصاله وراح خطب بت الحسب
نجرى ننام علشان يا بكرة تدور قوام
و ادينى عاد نعسانة من تلتين سنه
و كمان سنه
و عروسة بتخيط ف توبها بخيط و إبرة
و ناس بتحلم بزفة بكرة
و صحيت على صرخة و أنين
قالوا الزمان أصبح مشقلب
قلت لا و الله إحنا ملخبطين
من فضلك اضف تعليق يهمنا اقتراحاتكم